ហុងកុង៖ ទីក្រុងហុងកុងនឹងផ្អាកជើងហោះហើរដែលចុះមកប្តូរជើងយន្តហោះ (Transit) ក្នុងអាកាសយានដ្ឋានរបស់ខ្លួនរយៈពេលមួយខែពីប្រទេសនិងដែនដីប្រមាណ១៥០ដែលត្រូវបានចាត់ទុកថាមានហានិភ័យខ្ពស់ដោយសារតែមេរោគកូវីដ-១៩។
ការសម្រេចចិត្តផ្អាករបស់ហុងកុង នាពេលនេះបានកើតឡើងស្របពេលដែល ហុងកុង បានឃើញមេរោគបំលែងថ្មី អូមីក្រុងចំនួន៥០ករណី។ វិធានការនេះត្រូវបានធ្វើឡើង «ដើម្បីគ្រប់គ្រងការរីករាលដាលនៃមេរោគបំលែងថ្មី Omicron ដែលឆ្លងកំពុងមានការឆ្លងខ្លាំង»។
កាលពីសប្តាហ៍មុន ហុងកុងក៏បានហាមឃាត់ការហោះហើរចូលពីប្រទេសអូស្ត្រាលី កាណាដា បារាំង ឥណ្ឌា ប៉ាគីស្ថាន ហ្វីលីពីន អង់គ្លេស និងសហរដ្ឋអាមេរិក។
គួរបញ្ជាក់ផងដែរថា ក្នុងប៉ុន្មានសប្តាហ៍ថ្មីៗនេះ អាជ្ញាធរហុងកុងបានរឹតបន្តឹងនិងបានណែនាំឡើងវិញនូវវិធានការទប់ស្កាត់នានា។ ក្នុងនោះផងដែររ បារ ក្លឹប រោងកុន កន្លែងហាត់ប្រាណ និងហាងកែសម្ផស្សត្រូវបានបញ្ជាឱ្យបិទ ខណៈដែលការទទួលទានអាហារនៅក្នុងភោជនីយដ្ឋានត្រូវបានហាមឃាត់បន្ទាប់ពីម៉ោង ៦ល្ងាច ហើយសាលាបឋមសិក្សា និងសាលាមត្តេយ្យក៏ត្រូវបានបិទផងដែរ៕
